නිවසේදී නිතරම අත්‍යවශ්‍ය වන අත් බෙහෙත් - 4 ( අම්ල පිත්තය / ගැස්ට්‍රයිටීස් )

කලින් ලිපි වලින් ඔබ ඔබේ නිරෝගී කම රැක ගන්නට යම් දැනුමක් ලබාගෙන ඇති බව මම හිතනවා. මේ ලිපියෙන් මම බලාපොරොත්තු වෙන්නේ අපේ සමාජයේ බහුලවම පවතින සුලබ රෝගයක් වන ගැස්ට්‍රයිටීස් නැතිනම් අම්ල පිත්ත රෝග ගැන ඔබව දැනුවත් කරන්නයි.

මුලින්ම බලමු අම්ල පිත්තය කියන්නෙ මොකද්ද කියලා...

ආහාර ගන්නෙ නැතිව ගොඩක් වෙලා ඉන්නකොට ආමාශයේ අම්ල ගතිය වැඩිවෙනවා ඒ වගේම සැර කෑම ජාති නිතර නිතර ගන්න එක, මානසික ආතතිය වගේ දේ වලින් ආමාශය ආශ්‍රිතව තුවාල ඇති වීම නිසා තමයි මේ තත්වය ඇතිවෙන්නෙ.


මේ රෝගය ඇති විට...

අම්ල රසට/ ඇඹුල් රසට උගුරට ඒම, උගුර හා පපුවේ දැවිල්ල, බඩ පුරවා දැමීම, හෘද ප්‍රදේශයේ වේදනාව, හිසේ කැක්කුම, ඇග පත දැවිල්ල, මල බද්ධය හෝ ද්‍රව මල පිටවීම හා මල පිටවන විට දැවිල්ල ආදි ලක්ෂණ පවති.
බොහෝ විට මේ රෝගීන් ඔවුනට හෘද රෝගයක්  හෝ පිළිකා රෝගයක් පවතීයයි රැවටීමට ඉඩ තියෙනවා. ඒත් රෝගය හරියට හදුනා ගත්තම ප්‍රශ්නයක් නැහැ.

 දැන් අපි බලමු මේ ලෙඩේට කරන්න පුළුවන් ප්‍රතිකාර නැතිනම් අත් බේත් මොනවද කියලා....

මුලින්ම කෑමෙන් බීමෙන් පරිස්සම් වීම තමයි හොදම දේ. ඔබට මේ රෝගය පවතී නම්, සෑදුන විට / වැඩිවුනු විට,

තැඹිලි වතුර, කිරි, පුහුල්, දියලබු, වැටකොලු, කරවිල, බණ්ඩක්කා ආදී එළවළු ආදිය භාවිතය හොදයි.

තේ, කෝපි , ඇඹුල් කෙසෙල්, තෙල් කෑම, බැදුම්, රතු මාලු, මිටි කිරි දැමූ ව්‍යංජන ආදියෙන්  වැලකීමද හොදයි.

මුලින්ම බෙහෙත් කිරීමේද විරේකයක් කර ගැනීම තමයි හොදම දේ.

1. සූකිරි කලං 6 ක්, අරළු කලං 6 ක් කුඩුකර උතුරන වතුර කෝප්පයකට දමා රැයක් වහලා තියලා පෙරාගෙන උදේ හිස් බඩට බීමෙන් විරේක උනාට පස්සෙ තැම්බුම් හොදි එක්ක බත් ටිකක් කන්න පුළුවන්.
2. පුරුද්දක් ලෙස උණු වතුර බීම හොදයි.
3. දිය බත් කෑම ඉතා ගුණයි.
4.අමු ඉගුරු යුෂ මේස හැන්දක් මී පැණි  තේ හැදි 1 ක් මිශ්‍ර කර දිවා රෑ කෑමට පෙර බොන්න.
5. සෝඩා වතුර බීමද හොදයි.
6. සැවැන්දරා, බෙලිමුල්, පත්පාඩගම් චූර්ණ කර උණුවතුරින් බීම.
7. බෙලි කොල ආසවයට උක් හකුරු දමා බීම.
8. කීකිරිදිය යුෂ තේ හැදි 2 බැගින් කිරි සමග දිනපතා උදේ හවස බොන්න.
9. කීකිරිදිය පවනේ වේලා කුඩු කර තියාගෙන ග්‍රෑම් 20 බැගින් බටර් සමග මිශ්‍රකර උදේ සවස ගන්න.
10.අත්තික්කා පොතු චූර්ණය ග්‍රෑම් 20 උදේ සවස බටර් සමග කෑම.
11. භාෂ්කර ලවණ ග්‍රෑම් 20 උදේ සවස  බටර් සමග අනා කෑම.
12. ශංඛ වටී ගුලි 1-2 දක්වා උණු වතුරෙන් ගන්න.
13.අභයාරිෂ්ඨය උශිරාසවය මිශ්‍රකර කෑමට පසු මේස හැදි 1 ක් බොන්න.
14. ශංඛ භෂ්ම මංචාඩි 1 ක් වතුර සමග බොන්න
15.මුස්තකාද්‍යරිෂ්ඨය හෝ අභයාරිෂ්ඨය අවුන්ස 1 බැගින් කෑමට පෙර ගැනීමද හොදයි.
16.කුෂ්මාණ්ඩකාවලේහය කලං 1 බැගින් උදේ සවස මාස 3 ක් පමණ පාවිච්චි කලයුතුයි.

 ඉතින් මේ කියපු ක්‍රම වලින් පහසු එකක් භාවිතයෙන්  ඔබට අම්ල පිත්ත රෝගයෙන් පහසුවෙන් සුවය ලබා ගන්න පුළුවන් වේ යැයි මම හිතනවා ඒ වගේම ඔබේ කාලයත් මුදලුත් එමගින් ඉතිරි කරගෙන නිරෝගි බව ලබා ගන්න.ලෙඩේ හැදෙන්න කලින් පරිස්සම් වීම තමයි හොදම දේ කියලත් මතක් කරන්නම්....

තෙරුවන් සරණයි...!

ඇසුර - අත් බෙහෙත්

 ඔබේ අදහස් යොජනා පහලින් comment කරන්න.